اشتقت لي؟

بقلم / آية إسماعيل


عارفة خلاص هتقولي ما اشتقتش
بس انا اشتقت!!
انا حبي ليك زاد بفعل الوقت!
في بُعدك حبيبي الدنيا باهته
ألوانها سودة وشكلها يخُض
كل اشتباك فيا، أقدر في لحظة افُض
إالا اشتباك انا بيك
الفقر في الحب جريمة
وأنا جُرمي فقري إليك..
إن كنت عني اغتنيت
فأنا لسة محرومة
والزكا واجبة عليك
ياللي انت لسة ساكني رغم بعادنا
انا نفسي لو تسمح في هُدنة!
أقدر اشوفك
اقدر أحسك
أقدر احبك من جديد
انا عايزة منك فيّض
يرويني فاتبسم
انا عايشة باتقسِم
والأكتئاب صاحبي
ياللي انت غايب بس اسمع
انا اشتقت..
قلبي الحجر لآن
لما انسحبت!
أنا كنت ساذجة في حبك
انا كنت طفلة لسة ما بتفهمش
علمتني الحب، ومشيت!
علمتني أشتاق
علمتني أرسم
علمتني الشعر
علمتني استنى
والانتظار ملعون
أنا قلبي بيك مجنون..
وانت رزين عاقل!
أنا قلبي ليك شايل
حاجات من كترها صعب إني اقولها
محتاجة اشوفك
يا اللي اغتنيت عني..
عارفة كل ظروفك..
ولإني أفقر من الفقر ليك
ألزكا واجبة عليك
وده حق قلبي عليك…
والله المرة دي غير
المرة دي، حقيقي صادقة
اتنازل يا سيدي بلُقى
بضحكة، بكلمتين ع الماشي
وربي ما استغناشي!!
ومهما كنت اغتنيت…
فأنا قلبي على بابك…
اهو..
والله ما هو ماشي
صدقني ما استغناشي

مهما غبت حبيبي باقية
مهما تنسى أنا لسة فاكرة
مهما تبعد قلبي قريب
والعقل في الحب ما لوش نصيب
ولا فيش محبة بدون رضا
الوقت أنقضي والعمر خيال
وأنا قلبي ليك ميال..
والحب ليك متشال
كل الكلام جوايا…
وصعب لو يتقال!

وحشتني….
وحشني صوتك مع إني ما سمعتوش
وحشتني عينك رغم إني ما قرتهاش
وحشني قربك بالرغم ما جربتوش
وحشني قلبك، وانا قلبي جنبك عاش
والله ما استغناش

اترك رد