تقارير وتحقيقاتمقالات الرأي

الدكتوره مديحه دياب تكتب : الثبات الإنفعالي

قنا/ محمود عابدين

فى البدايه عدم الثبات الانفعالى يعنى عدم القدرة على السيطرة على الانفعالات وضبط النفس وبتصرف بطريقه تخسرنى كتير وارجع اندم بس وقتها بيبقى الوقت فات ، طيب خلينا نتفق إن الثبات الانفعالى خليط من الغضب والعصبية ،
الغضب والعصبية تمر بثلاث مراحل
ما قبل الغضب ، ودى وقت الحدث أو الموقف او الشخص اللى بيحدث بعده الغضب ، دى بقى رد فعلى اثناء الغضب وكل واحد والشكل اللى بيغضب به ضرب شتيمه يكسر الأشياء اللى موجودة حواليه
مابعد الغضب ، حوالى 99٪ من الناس العصبية بتندم بعض الغضب على ما فعلوا وقت الغضب
طيب حد يقولى كل الكلام دى نعرفه ايه بقى الجديد اقولكم بلاش تسرع
ضبط النفس المفروض يبقى فى أى مرحلة من المراحل السابقة اكيد مش بعد مرحلة الغضب ولا اثناء الغضب ودى جزء ناس كتير فاهمة غلط ضبط النفس لا يكون اثناء الغضب ولكن بيكون فى مرحلة ما قبل الغضب ،
اه وربنا صح كده مش بكذب
ليه بقى ما قبل الغضب علشان مش لازم استنى لما أوصل لمرحلة الغضب
طيب ممكن شخص يسأل طيب هو انا حأعرف أزاى انى الموقف او الشخص دى عاوز يعصبنى دى كلنا عارفنها من محيط التعامل مع الاشخاص دى ممكن شخص ليه سنوات بعيد عنك وما يعرف عنك حاجة ويجى مخصوص ويقابلك أو يتصل بيك علشان يعصبك فى موضوع معين سمعه عنك أو شخص ما قاله عليه واكيد انت عارف انه علاقته بيك مش حلوة علشان فجأة يطمئن عليك فحاول تكون هادئ بقدر المستطاع والله فى ناس كتير فى حياتنا كده واحنا وصلنا لمرحلة اننا بنعرف الناس اللى بتحب لنا الخير من الناس اللى مستنية تشوفنا بنوقع
ايه المطلوب منى علشان ضبط النفس أو التخلص من الغضب والعصبية
١- تمسك لسانك على قد ما تقدر لو انت من النوع اللى ميقدرش يمسك لسانه سيب المكان واعتذر بشياكة
٢- استعياذ بالله من الشيطان الرجيم
٣- سيب اللى قدامك يتكلم ويتكلم وانت بقى حلل وفكر فى كلامه يعنى مثلا قال جزء فى كلامه محدش يعرفه غير اشخاص قريبة قوى منك فكر يا ترى مين اللى قاله بأمانة دى مش علشان تعرف مين اللى قاله دى علشان تشغل نفسك عن الرد عليه وتسيبه هو يغلط
٤- غير وضعك يعنى لو انت قاعد اقف ولو واقف اقعد
٤- النقطة دى لو الموضوع جالك فى التليفون اتوضأ وصلى ودى علشان السجود وقت ابصلاة بيساعد على ضبط النفس وكمان الارض وانت ساجد بتمتص شحنة الغضب والعصبية اللى عندك واكيد طبعا الرجوع لله سبحانه وتعالى بيعطى هدوء وسكينة
كما انه الرسول عليه الصلاة والسلام قال الغضب من نار
٥- ادارة الوقت وممكن حد يقول ايه دخل ادارة الوقت بالثبات الانفعالى لها علاقة لانه عدم القدرة على ترتيب أمور حياتنا والتخطيط لحياتنا بشكل صح بيساعد على وجود ضغوط فى الحياة ومنها للعصبية والغضب فياريت ننظم امور حياتنا قدر ما نستطيع
فى كمان حاجات بتساعد على تقويه الثبات الانفعالى
١-القراءة بشكل عام
٢- تنميه المهارات المختلفة يعنى انا مثلا مدمنة تدريبات سواء اون لاين او تدريبات احضرها شوفوا ايه المهارة او الشئ المفيد عندكم اللى ممكن تعاملوه علشان يساعد على تقويه الثبات الانفعالى
٣- ياريت لما تتسأل عن اى موضوع او رأيك أو مشكلة او شئ يتطلب منك انك تتكلم ترد بعد دققتين
ودى جزء الغالبية العظمى بتغلط فيه الرد بسرعة مش شطارة
٤-ممارسة الرياضة من اكثر الاشياء اللى بتساعد على ضبط النفس وتقلل العصبية
٥- الاسترخاء والتأمل فى الطبيعة فى حديقة او اى مكان هادئ
٦- نوت صغيرة واسجل فيها المواقف اللى مقدرتش اضبط فيها انفعالاتى ودى طبعا مع التكرار حيساعد فى انى اتعلم من المواقف السابقة
والخلاصة علشان يكون عندنا ثبات انفعالى ياريت متخدوش كل حاجة على محمل شخصى وياريت نتحرر من الذاتية شويه ونشترى خاطر بعض ونقرب من ربنا لانه قربنا من ربنا دى المفتاح الحقيقى لدخول الجنة .

اترك رد

إغلاق