البوابة اليوم

albawabhalyoum

الأغنية دى كتبتها على لسان عرايس الليلة الكبيرة، ليلة ما ودعنا الفنان الكبير ناجى شاكر، عرفاناً بفضله وعبقريته، وده طبعاً من شدة إعجابى...

[ad_1]

الأغنية دى كتبتها على لسان عرايس الليلة الكبيرة، ليلة ما ودعنا الفنان الكبير ناجى شاكر، عرفاناً بفضله وعبقريته، وده طبعاً من شدة إعجابى بفنه، وعمق محبتى لشقيقه العظيم صديقى الفنان التشكيلى العبقرى إيهاب شاكر، ربنا يديله طولة العمر. لكن للأسف حصلت ظروف عطلت تحقيق الأمنية، وتقديمها على المسرح فى ذكرى الأربعين.

دلوقتى الغنوة منشورة أهى، وباقول للمخرج المحترم خالد جلال لأنى متأكد من محبته للراحل الكبير: لو تحب نقدم سهرة حب فى ذكرى مولد ناجى شاكر، أو فى ذكرى رحيله اعترافاً بفضله.. إيدى على كتفك.

أوبريت الليلة الكبيرة

لفنك مش ناكر

أفضالك علينا كتيرة

يا عمو ناجى شاكر

جاهين وسيد مكاوى

كتبونا وغنونا

لكن إيد وخيال الغاوى

خلوا الناس يشوفونا

كل عروسة وليها حكاوى

وفيها روح معجونة

أوبريت الليلة الكبيرة

لفنك مش ناكر

أفضالك علينا كتيرة

يا عمو ناجى شاكر

خفة دم عجيبة شاربها

ليف وخشب وقماش

دايماً بنموت فى دباديبها

وعنها ما نستغناش

فنك عمره يوم ما يسيبها

ومن أول يوم عاش

أوبريت الليلة الكبيرة

لفنك مش ناكر

أفضالك علينا كتيرة

يا عمو ناجى شاكر

من عرايسك ريحة بلدى

عطر جميل بيفوح

مهما الوقت عليها يعدى

مش ممكن حيروح

أبدعها فنان يا وعدى

وفيها نفخ الروح

أوبريت الليلة الكبيرة

لفنك مش ناكر

أفضالك علينا كتيرة

يا عمو ناجى شاكر

مسعِد والريس حنتيرة

ماشيين فى حوارى المنيرة

والأراجوز وشجيع السيما

سوا قاعدين على الحصيرة

واللى راكب على مرجيحة

واللى ف إيدها ماسكة فطيرة

كلهم بيغنوا معانا

والضحكة بتقول ويانا

باى باى للتكشيرة

أوبريت الليلة الكبيرة

لفنك مش ناكر

أفضالك علينا كتيرة

يا عمو ناجى شاكر

 

[ad_2]

البوابة اليوم - albawabhalyoum

No comments so far.

Be first to leave comment below.

لن يتم نشر عنوان بريدك الإلكتروني. الحقول الإلزامية مشار إليها بـ *